Archive for January, 2016

kapilas ng buhay

Posted: January 27, 2016 in Uncategorized

Mula nang halinahin ng iyong kariktan
Inuugoy ng walang hanggang galamgam
Nag-uumapaw sa mga rekwerdo ng tamis at saya
Katulad ng isang umaga ng linggong halos hindi nagkikibuan, magkatabi at parehong abala

Sa bawat pag-abot ng kamay mo sa akin, sa maliliit na halik at sandaling mga yapos
O kahit pa wala
Alam kong hindi ako mag-isa
Walang pinag-iba sa mga gabing puno ng halakhakan habang magkahalabid ang mga binti at bisig

Kaya itatrato kong regalo ang bawat gabing nagtatapos sa tahimik at kalmang pagbalot ng mga bisig mo sa akin
Susulitin ko ang bawat umagang gumigising sa iyong tabi, sinasalubong ng iyong ngiti
Hindi kailanman iignas, kundi lalo pang kakapit

Masasabik na parang kulang sa oras
Manggigigil na parang hindi sa tahanan mo umuuwi
Iibigin ka na parang wala nang bukas

 

 

CherryRed 2015